Tamangajammik qinigassanngorteqqipput

Qaqortumi kommunalbestyrelsimi inissat 11-iupput, massakkullu ilaasortaasut, marluk kisimik pinnatik qinigassanngorteqqipput. Peter Ostermann, Atassummeeriarluni kingorna attaviitsunngortoq ukiuni 25-ni politikimi sulereerluni tunuartussanngorpoq. Qinigassanngorteqqinngitsup aapparaa inuit pissusiinik ilisimatooq Else Poulsen (IA).

Qaqortup kommunalbestyrelsianut qinigassanngortittut katillutik 37-iupput, taakkunannga arnat 10-ullutik.

Demokraatit nutaarsiassartaapput 7-nik qinigassanngortitsillutik, sassartullu ilagaat kommunaldirektøriusimasoq Leif Ellebæk Motzfeldt politeerlu Carl Rødgaard.

Atassut Qaqortumi 3-innarnik sassartitaqarpoq, taakununnga ilaalluni Bibi Kielsen, inatsisartunut kingullermik aamma qinigassanngortittoq.

Siumut 15-nik qinigassanngortitaqarpoq, massakkut ilaasortaasut 6-t tamarmik borgmesteri Tommy Marø borgmesterillu tullersortaa Simon Simonsen siuttoralugit sassarlutik. Nutaartaapput naalakkersuisuni ilaasortaasimasoq Kaj Egede kiisalu tuttuutilik Stefán H. Magnusson.

Inuit Ataqatigiit 12-nik qinigassanngortipput, massakkut ilaasortaasut 3-t sassaqqillutik, ilaatigut inatsisartuni ilaasortaq Aqqalukasik Kanuthsen. IA-p nutaartaanut ilaavoq savaatilinnut siunnersorti Aqqalooraq Frederiksen.