Isumalioqatigiissitaq suleqatigiissitaliorpoq
Namminersorneq pillugu ataatsimoortumik isumalioqatigiissitaq inuiaattut pisinnaatitaaffiit pillugit pingajussaa nutaamik ippassaq suleqatigiissitaliorput.
Suleqatigiissitaliaq erseqqarilluinnartumik assortuunnertaqanngitsumillu isumalioqatigiissitamit suliassinneqartoq, siulittaasunngortup Lars-Emil Johansenip radioaviisimut ippassaq unnukkut oqaatigaa.
Kalaallit inuiattut nammineersinnaassusiat qanoq isikkulerneqarsinnaanersoq ataatsimoortumik isumalioqatigiissitaliamut nalunaarusiarineqassaaq.
Inuiaat pisinnaatitaafii pillugit FN-ip inatsisaa malillugu nunarput pisinnaatitaaffilerneqassanersoq misissorneqassaaq. Danmarkip tunngaviusumik inatsisaanut sanilliullugu nunarput pisinnaatitaaffilerneqarpat qanoq inissisimalissanersoq suleqatigiissitaliap suliassarilerpaa.
Namminersornerullutik Oqartussat Danmarkimit akisussaaffinnik tigusinissaanni suna periaaseq atorlugu naammassiniarneqarsinnaanersoq suleqatigiissitap suliassarissavaa.
Suleqatigiissitaliap ilaasortariligai makkuupput: Danmarkimi nunanut allanut ministeriusimasoq Niels Helveg Petersen, Line Barfod Enhedslistimeersoq, Birthe Rønn Hornbech Venstreneersoq.
Kalaallini ilaasortanngorput Augusta Salling, Arkaluk Lynge, taakku inatsisartut siulittaasoqarfiani ilaasortaapput, siulittaasunngorporlu Folketingimi ilaasortaq Lars-Emil Johansen.