Puisut amiinik suliarinnittartut avammullu tuniniaasartut Great Greenland, puisit amii piinnarnagit neqaa aamma avammut tuniniartalernissaa tunaartaralugu misileraanerit ingerlatileruttorpaat. Misileraanermi Maniitsumi Napasumilu puisit ilivitsunngorlugit pisiarineqartalerput, Great Greenlandimilu aningaasaqarnermut pisortaq, Jakob Abelsen isumalluarpoq, Europamimi neqit panertitat pisiarineqaleraluttuinnarput.
-Europamut nuukkiartulernikuuvoq Amerikami atugaasarnikuusoq, tassa neqit panertitat tunisaanerat. Proteineqarnerat kiisalu peqqissutsimut iluaqutaasinnaanerat tunuliaqutaralugu tunisaaleraluttuinnarput, tamannalu akuuffigerusullugu neqinik panertitanik tunisaqalernissaq piviusunngortikkusupparput, Jakob Abelsen oqarpoq.
Puisip amia neqaalu taamaallaat iluaqutiginiarneqanngilaq, orsutaali aamma iluaqutiginiarneqarluni. Taamaammat Great Greenlandip ataani inissisimasumik aqunneqartumillu suliffik Greenland Lipid Solutions, GLS, ukiut marluk matuma siornagut pilersinneqarpoq.
Jakob Abelsen oqarpoq puisit amiinik tunisineq annertusiartortoq, Great Greenlandillu neqinik tuniniaaniarnera ima tunuliaquserpaa
-Puisimik sammisaqareernerput atorluassagutsigu pissusissamisoorsoraarput neqinik aamma tuniniaasalernissaq.
2002-mi puisit amii 61.000-t Great Greenlandimut tunineqarput, 2003-mi 75.000-pput, siornalu 83.000-iullutik.