Namminiilivissagutta sipaartariaqarpugut
Naalakkersuisut Aningaasaqarneq pillugu nalunaarusiaani nunatta ukioq 2005-mimiit 2020-p tungaanut siuariartornissaanut naatsorsuusiorneq nunattalu namminiilivinnissaanut piareersartariaqarneq Aningaasaqarnermut Naalakkersuisup pisariaqarnerarpaa.
Nunatta karsiata imaasa 60 procentii Danskit tapissutaannit EU-millu niueqateqarnermit pisartillugit nammineernerujartornermut tamanna killilersimaartitsisinnaasoq, Josef Motzfeldt oqarpoq.
Naalagaaffimmit ukiumut tapiissutaasartut ikilisinneqarnissaanik kissaateqartoqalissappat milliuunerpassuarnillu annaasaqartoqarluni, tamanna namminiileriartornermut akornutaasinnaasoq Josef Motzfeldt oqarpoq.
Naalakkersuisut nalunaarusiaanni oqartussani sipaarniartoqarnissaa siunnersuutigineqarpoq tamatumunnga ilutigitillugu ilinniartitaanermik qaffassaanissaq siunnersuutigineqarluni. Ukioq 2013-ip tungaanut ilinniartitaanermut 400 mio. kronet aningaasaliissutigineqassasut Nalunaarusiami siunnersuutigineqarpoq.
Naalakkersuisut aningaasaqarnikkut ingerlatsineq pillugu nalunaarsiaat Inatsisartut upernaaru ataatsimiinnerminni isummerfigissavaat.