Kalaallit Københavnimi najugallit inuuniarnermikkullu ajornartorsiortut ikiorserniarlugit Socialministeriaqarfiup- inunnik isumaginninnermut ministeriaqarfiup ukioq manna 5,5 mio. kronenik aningaasaliiffigai.
Aningaasat kallaallit inuuniarnermikkut ajornartorsiuteqartut inissaqarniarnerisa nutaamik aaqqissuussiffiginissaanut, qallunaatut ilinniartinneqarnissaannut, taakkualu isumaginnittuisa pikkorissartinneqarnissaanut atorneqassapput.
- Kalaallit inuuniarnermikkut ajornartorsiuteqartut kikkuuneri, qasserpiaaneri qanorlu ikiorsiinikkut atorfissaqartitsitsigineri suli ilisimanngilarput. Kalaallillu pineqartut inunnik isumaginnittuisa pikkorissartinneqarnissartik ukiuni arlaqalersuni kissaatigiuarsimavaat, Københavnip borgmesteria SF-neersoq Bo Asmus Kjeldgaard, nutaarsiassaqartitsivimmut Ritzau-mut oqarpoq.
Københavnimi kalaallinik inuuniarnermikkut ajornartorsiuteqartunik ikiorsiineq Kalaallit Illuisa, Kofoeds Skolep Christianiamilu HOV-p suleqatigiillutik ingerlatissavaat.
Socialministeriap ikiorsiiniarnermut aningaalissutigisartagai 2007-ip tungaanut killeqarput, tassanilu Danmarkimi illoqarfiit annerit qinnuteqaqqullugit kajumissaarneqarput.