Kalaallit inuiattut akuerineqarnissaat qanillivoq

Danmarkimi nunanut allanut ministeri nalunaarpoq Danmarkip nunarput pillugu Naalagaaffiit Peqatigiinnut eqqunngitsumik paasissutissiisarsimanera naqqiuteqarfigineqassasoq. Tamanna pivoq Folketingimut ilaasortaatitarput Siumumeersoq Lars-Emil Johansen, naqqiuteqartoqarnissaanik apeqquteqaateqareersorlu.

- Assorujussuaq torraavoq naalakkersuisut sinnerlugit nunanut allanut ministerip nalunaaruteqarnera. Tamanna nunatsinnut ataqqinninnerulernermik aammalu nassuernermik ”kukkusimavugut”, nassuertut naviigassaanngillat nersualaagassaapput. Nassuernermut Lars-Emil Johansen taama oqaaseqarpoq.

Ilulissani sap. akunneri marluk qaangiuppata Namminersorneq pillugu ataatsimiinnissami tamanna sammineqassasoq Lars-Emil Johansen oqarpoq.

- Tassa kalaallit inuiaat inuiattut, FN-imi silarsuarmioqatigiit inatsisiliuunneqartarnerat najoqqutaralugu inuiattut akuerineqarsinnaasutut, nunanut allanut ministereqarfiup nalunaarutigaa. Inuiattut akuerineqarsinnaanerput uaneralaannguamiittutut ippoq.

Tamanna pillugu Lars-Emil Johansen neriunnerarpoq nunatsinni naalakkersuisut siulittaasuat Savalimmiuni naalakkersuisut siulittaasuatulli, Naalagaaffiit Peqatigiinnut paasissutissiisarnermik nammineerluni ingerlatsilernissamik piumasaqarnissaminut aamma sapiissuseqalerumaartoq.

- Tassa nunarput pillugu sunilluunniit avammut paasissutissiineq nunatsinniit ingerlanneqartassasoq, Danmarkimi nunanut allanut ministereqarfimmiunngitsoq.

Danmarkimi naalakkersuisut Lars-Emil Johansen-ip apeqquteqataanut akissutiminni allapput, Naalagaaffiit Peqatigiinnut nunarput pillugu paasissutissat, imaqarniliat nalunaarutillu eqquvinngitsumik paasissutissiisut naqqinneqarnissaat anguniarlugu Naalagaaffiit Peqatigiinnut attaveqarumaartut.