Nunarput pillugu avammut paasissutissiisarnerit eqqortut ujartorneqarput
Savalimmiuni naalakkersuisut siulittaasuat, Joannes Eidesgaard, Danmarkip nunat allanut ministeriaqarfiannit Savalimmiut pillugit paasissutissiisarnerit kukkusuusarnerarlugit maanna unitsinnialerpai, oqarluni Savalimmiut naalakkersuisuisa paasissutissiisarnerit nammineq ingerlattalissagaat.
Paasissutissat ilaat Naalagaaffiit Peqatigiinnut FN-imut tunniunneqartarsimapput.
Danmarkip nunanut allanut ministerianut Per Stig Møllerimut allagaqarluni Joannes Eidesgaard taama nalunaaruteqarpoq.
Danmarkip nunanut allanut ministeriaqarfiata marlussoriarluni Savalimmiut pillugit kukkusumik paasissutissiisarsimanerarlugu oqarpoq.
1999-imi Danmark FN-imut oqarsimaneragaavoq Savalimmiormiut tungaaninngaanniit namminersulivinnissamut innuttaasunik taasisitsinissamik pilersaaruteqartoqanngitsoq.
2001-imilu Danmark FN-imut oqarsimaneragaavoq Savalimmiormiut immikkuullarissuunatik danskisut imminut isigisuusut.
Paasissutissiisarsimanerit kukkusut pissutigalugit, Joannes Eidesgaard nunat tamalaat paasitikkusuppai Savalimmiormiut allanik eqqarsaatersortuusut.
Kalaallit Nunaannummi tamanna attuumassuteqarsinnaanerpoq?
Nunarput pillugu Danmarkip kukkusumik paasisitsoqartarsimanerarlugu folketingimi atlantikup avannaani qinikkat suleqatigiiffiat saqqummiussinikuuvoq. Nunattalu Folketingimut ilaasortaatitaata aappaat Lars-Emil Johansen Joannes Eidesgaardip pilersaarutai tapersersorpai:
- Nuannaarutigaara Savalimmiuni naalakkersuisut siulittaasuat taama nalunaaruteqarsimammat. Paasilluarsinnaavara Savalimmiormiut naalakkersuisuisa siulittaasuat taamatut alloriarsimammat, tassa pissusissaq eqqortoq, Lars-Emil Johansen oqarpoq.
Naalakkersuisut siulittaasuat Hans Enoksen aamma taamaaliorsinnaanerannut Lars-Emil Johansen neriuuteqarpoq:
- Neriuutigaara nunatsinni naalakkersuisut aamma kalaallit inuiaat pillugit avammut paasissutissiinissamut sapiissuseqassasut, tamatumunngalu tunngasumik Danmarkip naalakkersuisuinut saaffiginnissuteqassasut, Lars-Emil Johansen oqarpoq.
Naalakkersuisut siulittaasuat Hans Enoksen tamanna pillugu oqaaseqartinniaraluaratsigu iluatsinngilarput.