- Tunu takornarianut ussassaarutigineqarnerulissaaq, takornariallu amerlisinniarpagut, inuiaqatigiinni aningaasat kaaviiaartitat amerliniassammata, Tunumi takornariaqartitsinermik sulialik Anders Stenbakken oqarpoq. Tamanna anguniarlugu suliniut nutaaq pilersinneqarpoq.
Suliniut Destination East Greenlandimik taaneqarsimavoq. Tasiilap Illoqqortoormiullu kommunii suleqatigiinniarlutik isumaqatigiissuteqarput, isumaqatigiissummilu takornarianut ataatsimoorluni ussassaaruteqarnissaq anguniarneqarpoq, takornariartitsinikkullu periarfissat ineriartortinneqarnissaat ujartorneqarluni.
Nunaqarfiit aningaasanik isertitaqarnerulernissaat anguniarneqarpoq, takornariaqartitsinermik sulialik Anders Stenbakken oqarpoq: - Takornariat pillugit suliniuteqarnitsinni nunaqarfiit iluanaarutissaqarnerulissagaluarpata, taava isumaqarpunga nunaqarfiit ataavarnissaat aamma qulakkiissagaluaripput, Anders Stenbakken oqarpoq.
Takornariartitsinikkullu kitaanut unammillernerunersut apeqqutigigatsinni ima akivoq: - Unamillertoqanngippat periarfissat akisunerulissapput, ajornerulissallutillu. Taamatullu isigissagutsigu isumaqarpunga takornariaqartitsiniarnerup tungaatigut unammillerneq peqqinnartuusoq, tamattami inissaqaqaagut, Anders Stenbakken tunngavilersorpoq.
Danskit Tunumut takornariat amerlinissaat anguniakkanut pingaarnernut ilaatinneqarpoq. Tunumut takornariat Danmarkimeersut ikittuinnaasarput, Islandikkoorluguli takornariartitsisoqartalersuuppat danskit takornariat amerlisinnaasut Anders Stenbakken oqarpoq.
Destination East Greenland pillugu paasissutissat allat nittartakkakkut pissarsiarineqarsinnaapput, uunga iserluni: www.EASTGREENLAND.COM.