Nunatta ujarai natsisiliassatut piukkunneqarput

Nunatta ujarai atorlugit nunatsinni natsisiliortoqarsinnaallunilu nerriviup qaavanik sanasoqarsinnaava?

Taamaattuliornissamik periarfissaqarnersoq, Greenland Ressourcesip sanaartugassanillu suliassinneqartartup Grønlandsk Produktion A/S-ip, ukiuni kingullerni qimerluuataarsimavaat.

Natsisissaliortoqarsinnaaneranut takussutissatut nalunaarusiartik ippassaq saqqummiuppaat.

Ujarassiuup, Hans Kristian Olsenip, Greenland Ressources tunuliaqutaralugu suliaq manna ingerlassimavaa. Ujaqqat sananermut misiliutaasussat 14-t Nuup kommunianni katersorneqarsimapput. Sananermilu atugassaqqissutut nalilerneqartut sisamaapput.

Nuup Kommueata Suliffissuaqarnermullu Pisortaqarfiup suliaq ingerlaqqissanersoq aalajangertussaassavaat.

Nuup Kommueani kommunaldirektørip, Kim Hvistendahlip, pilersaarutit iluarai, oqarluni ineriartortitsisoqarumaartoq.

Ujaqqat pineqartut Nuummi Katuap paarlersuani saqqummersinneqarput.