Kranersuaq Nuup qeqqani uppippoq
Kranersuaq 37 miiterisut portutigisoq ualimut marlut missaani Nuummi inuit biilillu aqqutaannut uppimmat inunnik ajoqusertoqanngilaq.
Kranersuup uppinnerata kinguneranik Nuummi innallagissap aqqutaa ajoquserneqarpoq, taamaalineralu sinerissap sinneranut malunniulluni, tassa raatiukkut aallakaatitsineq sivisulaartumik unikkallarmat. KNR-mi raatiukkut aallakaatitsineq aatsaat aallerteqqippoq tallimap missaani.
Nuummi politiit pisortaata tullia Johan Davidsen oqarpoq suliaq suli misissorneqarmat oqaatigisinnaanagu suna pissutaalluni karaanersuaq uppissimanersoq, taanalu ima oqaluttuarpoq:
- Qanorpiaq pisoqarsimanersoq maannakkorpiaq misissorparput, uppinnerata nalaani Nuummi anorlingaatsiarpoq, silalu pissutaasimasinnaavoq kranersuup uppinneranut.
Taama oqarpoq Nuummi politiit pisortaata tullia Johan Davidsen.
Illorsualiaq Sparbank Vestimit Tele-Postimillu suliaritinneqarpoq.