Nikolinep kalaaleqatini sullinniarpai
Nikoline Ziemer 32-nik ukioqartoq Qasigiannguanilu inunngortoq, Valby-mi najuqalersimasoq SF sinnerlugu Folketingimut qinigassanngortippoq 451-nik taaneqarsimalluni.
- Taaneqarsimanera naammagisimaartorujussuuvara, naatsersuutigisattummi ingerlavoq. Nutaajoqaangami inuillu naluaannga kinaasunga. Taamaammat una qineqqusaarneq misiliineruvoq pingaaruteqartorujussuaq, Nikoline Ziemer oqarpoq.
Nikoline Ziemer qinigassanngorteqqinniarpoq, qineqqusaarninilu arriitsumik aallartereerpaa, atini tusagassiutini ilisimaneqalerniassammat.
-Qineqqusaarnera ilinniutiginiarpara. Suna iluatsippa, sunalu iluatsinngila. Marloriarlunga avisiniippunga, avisinullu allaaserisarpassuaqarpunga nalunaaruteqartarlungalu, Nikoline Ziemer oqarpoq.
Nikoline Ziemerip apeqqarissaarnerni peqataasarsimavoq TV-miissimallunilu, taamaammallu inunnit ilisarineqarnerusalersimalluni.
Nikoline Ziemer, tulliani qineqqusaarnissaminut avatangiisit, suliffissaaleqineq inuiaqatigiinnut ilanngutitaaneq, kalaallillu Danmarkimiittut kulturikkut kalaallisullu atuartitaanikkut atugarisaat pitsanngorsarniarlugit sulissuteqarniarpoq.
Nikoline Ziemerip nunarput sinnerlugu Folketingimi ilaasortanngortut Lars-Emil Johansen aamma Kuupik Kleist oqallitsitsinikkut suleqatiginiarpai.