KNR: Atortulunneq arriisaarnermut pissutaavoq
Folketingimut qinersinermi KNR-TV-p ippassaq unnukkut aallakaatitsinera isiginnaartunut qinersinerup inerneranik malinnaasunut pissangasunullu arlalitsigut kipiluttunarpoq. Kisitsisit qinersivinniit ataasiakkaaneersut takkunnialuusaartarput, takkukkaangamillu ilaanni kukkuneqartarlutik.
Atortut pisoqaavallaartut inernerillu faxiinnakkut takkussuunnerat KNR-imi aallakaatitsinermut pisortap Naja Paulsen-ip ilaatigut pisuunerarpai, kommunalbestyrelsinullu apriilimi qinersinissamut KNR pitsaanerusumik kiffartuussissasoq neriorsuutigaa.
- Inernerit faxikkut nasiussuunneqariarlutik qarasaasiamut assaannarmik nussorneqarnerat, kingornalu TV-mut nuunniarnerat ajornartorsiutaavoq. Atortut pisoqaavallaarnerat ilaatigut tamatumunnga pissutaavoq, Naja Paulsen oqarpoq.
Isumaqarpoq Internetikkut periarfissat nutaaliaanerusut atorneqartuuppata pitsaanerusumik kiffartuussisoqarsinnaagaluartoq.
- KNR-ili tamatumani kisimi apeqqutaanngilaq, suleqatigisartakkalli, soorlu Naalagaaffiup Sinniisoqarfia Qinersinermullu Siulersuisut ataatsimoortumik aaqqeeqatigineqartariaqarput, Naja Paulsen oqarpoq.
KNR-ip aallakaatitassiornermi pisortaata neriorsuutigaa kommunimut apriilimi qinersinerup inerneri ippassarnit torernerusumik saqqummiunneqartarumaartut.