Lars-Emil Johansenip qinigaaqqinnini tuppalliutigaa

Lars-Emil Johansen 4774-inik taaneqarluni Folketingimi ingerlaqqittussanngorpoq. Qinigaaqqinnini tuppalliutiginerarpaa, ukiullu 34-it matuma siorna folketingimut qinigaaqqaarami misigisani misigeqqissimanerarpaa, imalu nassuiarpaa:

- Qularnanga inerneqassasoq ajunngitsumik qinigaallunga misigivunga, suli qinersineq naammassinngitsoq. Tupinnarpoq taanna, taamanili qineqqusaartarnerpassuanni siullerpaamik misigisara aatsaat misigeqqippara, Lars-Emil Johansen oqarpoq. Aperineqarami qinigaanini sumut atorniarneraa akivoq:

- Folketingimut ilaasortaanermi ukiuni makkunani suliassat pingaarnersaraat Kalaallit Nunaanni naalakkersuinikkut namminiileriartornitsinnut siumut nutsuinissaq, soorlu qallunaat politikerit Danmarkimi naalakkersuisuusut kisiisa pinnagit, kisianni aamma nunatsinni politikerinik naalakkersuisunillu eqeersaanissaq, siuttuunissaq, aqqutissiuussinissaq sapiissuseqarnermillu tunniussinissaq. Inuiaat kalaallit ullumikkut Kuupimmut uannullu uppernarsaqqippaat; - aap taamatut ingerlanersi akueraarput, taanna ingerlateqqikkusupparput -, Lars-Emil Johansen nassuiaavoq.