Qinersiartortut ikinnerupput

Sinerissami qinersisartut Folketingimut ullumi qinerserusuttut qinersinermut siulianut naleqqiullutik ikileriarsimapput.

Illoqarfinni annerni tallimani, tassa Ilulissani, Sisimiuni, Nuummi, Qaqortumi taavalu Tasiilami, nal. 17:00 qinersiartorsimasut procentinngorlugu amerlassusiat kingullermik Folketingimut qinersinermit appariaateqartoq, qinersivinni taakkunani qinersititsisut ilisimatitsipput.

Folketingimut 2001-imi qinersinermut ullumi qinersineq naleqqiutissagaanni, Qaqortumi appariaateqarnerpaavoq. Tassani 49,5 %-it ullumi qinersisimapput, kingullermik qinersinermi taamaalinerani 65,7 %-iusimallutik.

Tasiilami Nuummilu qinersiartortut ullumi kinguariarnerat 6 %-ip 8 %-illu akornanniippoq.

Aamma Sisimiuni Ilulissanilu Folketingimut 2001-imi qinersineq eqqaassagaanni, qinersiartortut ullumi kinguariaateqarput, Sisimiuni qinersisut procentinik pingasunik affarmillu kinguartut Ilulissani ullumi qinersineq procentip aappaa avillugu kinguariarfiuvoq.