Aaqqissuisut: Qineqqusaartut pikkunaak
Folketingimut qinigassanngortillutik sassartut qineqqusaarnerat Atuagalliutit Sermitsiallu aaqqissuisuisa pikkuginngilaat.
AG-p aaqqissuisuata Laila Ramlau-Hansenip tikkuarpaa qineqqusaarummik qineqqusaartut tamarmiullutik katersuuffigisinnaasaannik saqqummertoqannginnera. Qineqqusaarneq sumut tamaanga sangujoraarnerarpaa, qineqqusaarutillu ilaat Folketingimut tunnganngilluinnartut saqqummertarnerat malugisimanerarpaa.
- Qineqqusaartut qineqqusaarutaannaanerusunik saqqummiussuipput, soorlu Danmarkimut bilitsit akikillinissaannut tunngasunik, AG-p aaqqissuisua tikkuaavoq.
Sermitsiap aaqqissuisua Poul Krarup isumaqarpoq apeqqutit kommuninut inatsisartunullu tunngasut qineqqusaartut taputartuussimagaat.
- Folketingimi qinigaaffiup tulliani namminersornerup eqqunneqarnissaa suliassani pingaarnersaavoq, tamannali qinersisartunit sammineqarpianngilaq. Ulluinnarni atukkatik soqutigineruaat, Poul Krarup oqarpoq.