Danmarkiliarneq akikilliniarpaat
Socialdemokratit Danmarkimi naalakkersuisunngortitsissagaluarunik nunatta Danmarkillu akornanni angalaneq qanoq ililluni akikinnerusunngortinneqarsinnaanersoq misissorniarpaat. Partiip politikikkut oqaaseqartartua Frank Jensen taama ilisimatitsivoq.
- Angallanneq Namminersornerullutik Oqartussat oqaasissaqarfigaat, namminersornerli pillugu ataatsimoortumik isumalioqatigiissitat aqqutigalugit misissussavarput angalaniarneq akikillisaaffiginiarlugu iliuuseqartoqarsinnaanersoq, Frank Jensen oqarpoq.
Nunatta namminersulernissaa Socialdemokratit suleqataaffigerusupppat, nunattalu aningaasarsiornikkut Danmarkimik isumalluuteqarpallaarunnaarnissaa aamma tapersersorniarlugu.
- Tamanna ilaatigut pisinnaavoq Kalaallit Nunaanni inuussutissarsiornikkut siuarsaanikkut, soorlu aatsitassanik piiaaneq, takornariartitsineq, IT-mik siuarsaaneq allatigullu teknikikkut siuarsaaneq aqqutigalugit, Frank Jensen oqarpoq.