Illuatungiliuttut qanillattortut

Danmarkimi malunnarsiartuinnarpoq illuatungiliuttut naalakkersuisunut qanilliartortut. Tamanna qinersisartunik isumasiuinerit kingulliit takutippaat.

Illuatungiliuttut sukakkaluartut naalakkersuisut talerperliusut tapersersortaallu Dansk Folkeparti isumasiuinerni suli amerlanerussuteqarput.

Isumasiuinerit tamarmik katinnerisa agguaqatigiissinneranni naalakkersuisut tapersersortaalluni Folketingimi katillugit 91-nik inissaqalissapput, ullumikkornit marlunnik amerlanerusunik.

Taama missingersuinerup aqagu qinersinissap qanoq inerneqarnissaa pissanganarnerulersippaa. Pissutsimmi taamaalinerisigut Kristendemokratit atlantikullu avannaani qinikkat apeqqutaaleratarsinnaapput.

Nunatsinni Atassutip Demokraatillu naalakkersuisut borgerligiusut tapersersorniarlugit nalunaarutigereerpaat, sinnerisa, IA-p, Siumup Kattusseqatigiillu sorliit nunatsinnut tapersersuinerunersut apeqqutaatinniaraat.