Allakkatigut taasinerit ingerlalluarput

Folketingimut qinigassanngortittunut qinersiartornissaq marlunngorpat februaarip arfineq pingajuanni pissaaq. Qinersisinnaasut illoqarfigisaminni qinersivimmukarsinnanngitsut allakkatigut taasisinnaanerat kommunini periarfissiuunneqarsimavoq.

Folketingimut qinersinissap qaqugu pinissaa nalunaarutigineqaannartorli sinerissami kommunini allakkatigut taasisinnaaneq periarfissaalersimavoq. Illoqarfigisami qinersivimmut taasiartorsinnaanngitsut, soorlu napparsimavimmi uninngasut, utoqqaat illuini najugallit, parnaarussivimmiittut allallu qinersivimmukarnissamut periarfissaqanngitsut kommunermi sulisunit orninneqarlutik taasitinneqarnissamut periarfissaat maanna ingerlanneqaleruttorput.

Ilulissat kommuneani allattoqarfimmi allaffimmiu Pavia Lynge allakkatigut qinersititsisuusoq maannamut periutsit pillugit oqarpoq, innuttaasut qinersivimmukarsinnaangnitsut Ilulissat radioat aqqutigalugu qanoq iliuuseqarnissaannik ilisimatinneqarsimasut, ornigussinnaanngitsullu kommunimut nalunaaruteqaqquneqarsimasut. Taamaalilluni kommunimiit orninneqarlutik taasivissanik qinersitinneqartartut. Aamma napparsimavimmi uninngasut, utoqqaat illuanni najugallit kiisalu paarnaarussivimmiittut sianerfigineqartarsimapput, allakkatigut qinersisinnaanerannik periarfissarsiuullugit.

- Allakkatigut taasiniarlutik pisinnaanngitsut inuit marluulluta ikiortarpavut oqaloqatigalugit allaassullugillu, qinigassanngortittullu aqqi allassimasut, taakku arlaat qinertarpaat, Pavia Lynge nassuiaavoq, nangillunilu.

- Ilulissani najugaqavinngitsut allakkatigut taasiartorsimasut maanna 40-t 50-llu missaanniipput, Danmarkimilu najugaqavissut qulit ataallugit allakkatigut taasiartorsimasut qulit ataateqqavaat.

Allakkatigut taasiartortut tassaanerupput illoqarfimmi aqqusaaginnartut, angalasut, aallartussat ullormilu qinersivimmut anngussinnaangitsut. Maannamut allakkatigut taasissutit maanna katillutik 100-t missaanniipput, - sulili taasiartortunik isertoqartuarpoq, Pavia Lynge naggasiivoq.