EU-p akiliutini ikiliniarpai

Aalisarneq pillugu EU-mut isumaqatigiissut nutarterneqartussaq pillugu aalisarnermut naalakkersuisoq Rasmus Frederiksen Bruxellesimeeqqammerpoq. EU-lu isumaqatigiinniarniviit Ilulissani maajimi ingerlanneqassapput, tassanilu EU-p aalisagartassai allatigullu suleqatigiissutissat eqqartorneqassapput. EU-p aalisagartassai katillugit 180.000 tonsiusut ukiumut 319 mio.kr.-nik akilerneqartarput, EU-lli akiliutini 200 mio.kr-iinnanngortinniarai Rasmus Frederiksen oqarpoq.

-Tamanna akerlilerpara oqarlunga naatsorsuilluareerutta aatsaat aalisakkat nalinginik taaguisoqarsinnaasoq, Frederiksen oqarpoq.

Inuussutissat nioqqutissiarineqarnerannut tunngatillugu EU-p piumasaasa sukanganerulersinniarneqarnerata nunatsinnut atuutinnginnissaa Rasmus Frederiksenip ilanngullugu piumasarisimavaa.

-Tamanna aalisariutinut mikinernut aningaasarpassuarnik naleqartussaammat ikioqquvubnga, naalakkersuisoq oqarpoq.

EU-mut isumaqatigiinniarnerit maajip 6-anniit 9-aannut Ilulissani ingerlanneqassapput.