Illut mingutsinneqartut ingitserniaraat
Nunavummi illoqarfiit ilaanni Ikpiarjummi (Arctic Bay) aqerlussamik mingutsitsisoqangaatsiarsimanera pissutaalluni pisortat aalajangerput, illorpaalussuit ingitserneqassasut, Canadian Press ullumi taama allappoq.
Aatsitassanik aqerlumik zinkimillu piiaaffiusimasup eqqaaniittut illut igutsigassanngortut tassaapput naluttarfik eqaarsaartarfillu. Aatsitassamik piiaaffiusimasoq qaarusuk matuneqarmat, illorpaalussuit qimanneqarsimasut, Ikpiarjummi najugalinnit atorusunneqarsimagaluarput.
Nunavumi naalakkersuisut siulittaasuat Paul Okalik Ikpiarjummut tikeraareerluni aalajangerpoq, aatsitassamik piiaaffiusimasup eqqaani illuliat naqqi mingutsitsiviusimavallaaqimmata, inunnik atorneqarsinnaanngitsutut nalilertariaqartut, illuliallu ingitserneqartariaqartut.