Sungiusaasoq soraartariaqassaaq
Nunanut allanut unammisartut nunatsinneersut periarfissaarutsinneqarnerat Nunatsinni sisoratartut kattuffiata tupaallaatigaa.
Danskit sisorartartut kattuffianit Team Danmarkimit tapiissutigineqartartut ikilerujussuarnerisa kingunerissavaa, sungiusaasup soraarsitaaneranik Nunarpullu sinnerlugu unammersuartarnernut peqataasarunaarneq.
- Ilungersunaqaaq, sisorartartut kattuffiata siulittaasua Kristian Lynge Petersen Radioaviisimut oqarpoq
Lillehammerimi sungiusartarfik matuneqassaaq, Rjukanimilu Kalaallit GU-jutigalutik sisorarnermik sungiusartarnerat taamaatinneqassaaq.
Sungiusariartittarnissaat akilersinnaajunnaassaaq, unammisartullu piumassuseerutissasut, Kristian Lynge Petersen isumaqarpoq. Danskit suleqatigiunnaarlugit allanik suleqatissarsiornissaq periarfissatuaalerpoq, taammammat Norgemi, Islandimi Sverigimilu sisorarnermik kattuffiit suleqatiginiartariaqartut, Kristian Lynge Petersen, GSF-mi siulittaasoq oqarpoq.