Kalallit Danmarkimi oqaatsiminnik ilinniartinneqarsinnaasariaqarput
Kalaallit savalimmiormiullu, inunnguuseralugu oqaatsiminnik Danmarkimut nunasisut allat assigalugit ilinniartinneqartassapput.
Kalaaleq 31-inik ukiulik Nikoline Ziemer, Folketingimut Socialistisk Folkeparti sinnerlugu qinigassanngortittoq taama oqarpoq.
- Allamiut qallunaanut akulerunnissaannik oqallinnermi kalaallit aamma ilaatinneqartariaqartut isumaqarpunga, tassami kulturikkut assigiinngilluinnartunik tunuliaqutaqarpugut.
Oqaatsit kinaassutsimut annertuumik pingaaruteqarput, allat oqaasiinik ilinniarnerpit kingunerisarpaa kinaassutsippit tunulliukkallartariaqarnera, tamannalu pissusissamisoorsorinngilara, Nikoline Ziemer oqarpoq.
Nikoline Ziemerip aamma siunnersuutigaa, eqqumiitsuliortunut isiginnaartitsinermillu sulialinnut tapersersuisussamik, kulturimut tunngasunut aningaasaateqarfeqalernissaq, taamaalilluni aamma qallunaat kalaallinut isiginnittaasiannik, tassalu isummiuteriikkanik ajornannginnersiortumillu isiginnittarneq peerneqassanerarlugu.
- Isiginnaartitsisartoqatigiit ilinniarfiutigisut Tuukkaq Teateri, maanna pigiunnaarsimavavut. Tamanna immini annilaammisaarnarpoq. Naak kulturikkut ineriartorneq? Isumaqarpunga apeqqut taanna pingaaruteqartoq, kulturitta pigiinnarnissaanut siuarsarnissaanullu.