Allamik siulittaasortaarusunngikkallarput

Inuit Ataqatigiit ataatsimeersuarnissaanni, Kuupik Kleist siulittaasussatut qinigassanngortittariaqartoq, Nuummi Inuit Ataqatigiit siulittaasorisimasaat Hjalmar Dahl AG-mut oqarpoq.

Josef Motzfeldt ukiorpassuarni ajunngilluinnartumik sulisimagaluartoq, Hjalmar Dahl isumaqarpoq inuusunnerit tullinnguunnissaannut piffissanngortoq. Tamanna naalakkersuinikkut suliniarnermi akerleriissuteqarnermik tunngaveqannginnerarpaa. Nuummi Inuit Ataqatigiit siulittaasortaavata, Elisabeth Ravn Johansenip, Josef Motzfeldtip sulinera ajunnginnerarlugu taarsertariaqanngikkallarnerarlugu Radioaviisimut oqarpoq.

Inuit Ataqatigiit inuusuttaat Elisabeth Ravn Johansenitulli isumaqarput, taamaattorli Kuupik Kleist qinigassanngortissappat ajoriffissaqartinnagu, Georg Olsen Radioaviisimut aamma oqarpoq, unammillerteqarnerlu Partiimut peqqinnaannassanerarlugu.

Hjalmar Dahlip AG-mut oqaasii pillugit oqaaseqartinniaraluaratsigu, AG-mut oqaatsimi saniatigut allamik oqaasissaqannginnerarpoq.