Islandimut aqqut pilerigineqarpoq
Islandimiut timmisartortitseqatigiiffiata Air Icelandip Nuummut toqqaannartumik aqquteqalersinnaanissamut assut soqutiginnerat, Royal Greenlandi aqqummut tassunga soqutiginnissinnaalluni aamma nalunaartareerpoq. Nunarsuarmi niiveqatitik sukkanerusumik ornissinnaanissaat soqutigisarigamikku, ingammik USA-mut Tuluit nunannut, Norgemut, Danmarkimullu. Avataanilu kilisaatersorlutik namminersorlutik Nuummi ukiorpassuarni ingerlataqartut Polar Seafood, timmisartumik toqqaannartumik Nuummiit Islandimut, Islandimiillu Nuummut aqqummik peqalersuuppat iluatinnartuutippaat, taamaasilluni suliffeqarfiup Air Icelandip pisortaata soqutiginninnera illerpaa, Polar Seafoodimilu pisortap tulliata Petrus Biilmannip nammineq misilittagarilersimasaminnut sanilliullugu Air Greenlandillu akigititaanik akikinnerussappat, aqqummut atuinissaminnut piareersimanerarput.
Air Icelandip pisortaa Jon Karl Olafsson radioaviisimut oqarpoq Nuummut ukiumut marloriarluni pingasoriarluniluunniit aqquteqalernissaq periarfissaqassagaluartoq, Nuummi mittarfik tallineqartuuppat.
Rekjavikkip Nuullu akornanni timmisartuussisarnerit 3 timet akornanni sivisussuseqarnissaat billitsillu 2000- 3000 koruuneqarnissaat naatsorsukannerneqarsimasoq, Air Icelandip pisortaa oqarpoq.
Inuit 17.000-t sinnilaarlugit Nuummiit Københavnimut 2003-mi timmissartumut ilaasimapput.
Islandimilu Iceland Express akikitsumik akiliisitsilluni Københavnimut 2003-mi timmisartuussisalerpoq, taanna 2500 koruuninik akeqarpoq.
Akunnerit pingasut timmisartorluni Reykjavikki Nuummiit orninneqarsinnaavoq, Reykjavikkimiillu Europaliartoqarsinnaallunilu amerikaliartoqarsinnaavoq
Air Iceland Nuummut Nuummiillu timmisartuussisalerusussinnaavoq, Nuulli mittarfia 400 meterinik talleqqaartariaqarpoq.