Illugiinnik oqaaseqarneq Folketingimi pisariaqarpoq

Folketingimi oqariartuutit paasineqassappata, qallunaatut oqalulluarsinnaaneq pisariaqarpoq, illuatungaanilu qallunaatuinnaq oqaasilik Kalaallit Nunaat sinnerlugu qinigaasimaguni, qinersisiminut isummaminik apuussiniarnermini ilungersunartorsiussasoq, Folketingimi ilaasortaasimasoq Moses Olsen isumaqarpoq. Georg Olsenip, IA-mit qineqqusaartup, oqaatsit aporfiunissaat ernummatiginngilaa: - Aatsaat politikkimik suliaqalinngilanga, aamma nunani allani ataatsimiinnerit assigiinngitsorpassuit peqataaffigisarnikuuakka, taamaammat akornutitut isiginngilara, Georg Olsen oqarpoq. Palle Christiansen nutserisoqarluni qinikkatut sulinermini misilittakkani aallaavigalugit aamma ernummateqanngilaq: - Inatsisartuni ilaasortaaninni misilittagaqarfigaara, qinikkatut angalanerini tamani nutserisumik ilaqartarluta. Folketingimut qinigaaguni aamma oqaatsitik atorlugit saaffiginnittut, oqaatsitik atorlugit akineqartarnissaat isumagissallugu Palle Christiansen oqarpoq.