Minngortuunnguup Atuarfia 2004-mi atuarfitsialanngorpoq

Sisimiuni atuarfiit pisoqaanersaat, Minngortuunnguup Atuarfia, 2004-p atuarfitsilaatut toqqarneqarpoq. Atuarfik pisoqaagaluartoq avatangiisit apeqqutaatinnagit Atuarfitsialaap siunertaa atuarfimmut iluatsittumik eqqunniarneqarsimavoq.

Atuarfeqarnermut pisortaqarfiup ukiup atuarfitsialaa toqqarnialeraangamiuk isiginiagaasa ilagisarpaat atuartitsinerup qanoq aaqqissuussaanera, qanoq suleqatigiittoqarnersoq sulinerullu nalilersorneqartarnera. Minngortunnguup Atuarfia 1950-ikkornisaasoq atuarfitsialattut toqqarneqarpoq ilaatigut pissutigalugu atuartut utoqqaassusiat apeqqutaatinnagu fagillu akimorlugit ilinniartitsisut suleqatigiillaqqissuummata.

Minngortuunnguup Atuarfiata siulersuisuini siulittaasup Agathe Storch-ip toqqarneqarnertik tulluusimaarutigaa. Oqarpoq Atuarfitsialaap siornatigut atuartitseriaatsimut naleqqiullugu allaasutaa Mingortuunnguup Atuarfiani atuartuni erseqqissumik takuneqarsinnaasoq:

- Uagut nalitsinni atuakkat qupperaannarlugit atuartinneqartarpugut. Ullumikkut atuartut assigiinngitsunik atortoqarlutik atuartinneqartarput, pinnguarlutik, sanallutik, misileraallutik, aneerlutik allatulluunniit iliortinneqarlutik. Pissangarnerujussuarmik atuariaaseqarput, sukkanerujussuarmillu ilikkartarlutik.

Atuartitseriaatsip Minngortuunnguup Atuarfiani ingerlanneqartup kinguneri meeqqani takuneqarsinnaalluartoq Agathe Storch isumaqarpoq.

- Eqaatsumik eqqarsariaaseq ilinniartarpaat. Soorlu paasigaangamikku ilinniagassaq ilikkarsinnaanagu allanik aqqutissiorlutik paasiniaasarput. Aamma imminnut piumaffiginerujussuupput, suna ilikkarusunnerlu namminneq ujartuisinnaalerlutik.

Minngortuunnguup Atuarfiani atuartut atuarfinni allanisulli imikkoortitigaapput minnernut akullernut angajullernullu. Atuartut immikkoortut tulliannut, allamut soorlu minnerniit akullernut ingerlaqqittussanngoraangata pisinnaasaat nalilersorneqartarput, nuuffissaanni ilinniartitsisut ilinniartitseriaasissaminnik piareersaasinnaaniassammata. Tamanna meeqqat piginnaassutsiminnik ilisimasaqarnerulernerannik kinguneqartoq Agathe Storch isumaqarpoq.

- Meeqqat atuarfimmiit anisussat nalunnginnerusarpaat suniarnerlutik, suut nukittuffigineqarlugit suullu aallukkunikkik angusaqarnerusonnaallutik.