Atassut Uummannami immikkoortortaqarfittaarpoq
Atassutip Uummannami immikkoortortaqarfia uummarteqqinneqarpoq. Ukiuni qulingajanni uninngareerluni partip immikkoortortaqarfia qanittukkut pilersinneqarpoq nutaanillu siulersuisortaarluni.
Kommunalbestyrelsimut qinersinissami apriilip 5-anni pisussami inissat qulingiluaasut ilaat pissarsiariniartussanngorpai.
Kingullermik Atassut Uummannap kommunalbestyrelsiani ilaasortaatitaqarpoq 1989-miit 93-mut. 1990-ikkut qiteqqunneranni partiip immikkoortortaqarfia unippoq, taamanerniillu Atassut Uummannap kommuniani sunniutaaruppoq.
Atassutip Uummannami siulittaasua Peter Kruse oqarpoq illuatungiliunnissaq pinerunagu kommunip ineriartorneranut sunniuteqaqataanissaq pingaartinnerugitsik.
-Qinersisartut pioreersunit allaanerusumik qinigassaqarnissaat aamma pingaartipparput, Peter Kruse oqarpoq.
Siumut 1979-miilli Uummannami amerlanerussuteqarluarluni aqutsisuuvoq.