Bardot nannunut saappoq

Filimiliaritittartuusimasoq Brigitte Bardot, issittup uumasuanik annaassiniarluni takoqqusaaqqilerpoq. Eqqaamaneqartutuut Canadamiut puisaasa qiveerneqanngitsut piniarneqarnerannut, 1980-ikkut ingerlaneranni akerliusunut siuuttuunikuuvoq, piniartunut kingunerlutsitseqisumik. Maannalu issittup uumasuisa pingaarnersaannut annaassiniarluni saqqummerpoq. Dronning Margrethemut allagaqarnermini, takornarissanut tammajuitsussarsiortitsilluni nannunniartitsisalernissaq akerleraa, ilaatigut takornarissat aningaasaatilissuit aassunnitsumik takorusuttunik taasimagai, Jyllands-Posten allaatiginnippoq.. Brigitte Bardotip Kalaallit Nunaanni Naalakkersuisut kajumissaarpai pinngortitaq mianeralugu takornarissanik angallassisartussanik ilinniartitseqqullugit. KNAPK-p siulittaasuata, Leif Fontainep tamanna annilaanngatiginngilaa, avataaniit taama tutsiuttarneq inuusaatsitsinnik ilisimasaqanngissusermik tunngaveqaannarnerarlugu, tamannalu sungiusimaannarnerarpaa. Naalakkersuisunut kajumissaarutigeqqiinnassanerarpaa nunatta avataani inuusaaserput pillugu paasitsiniaanissaq.