Nipilersuusiat ujaqqallu nuannerluinnartumik ataqatigiissinneqarnerat
Kalaallit Nunaanni ujaqqat isiginnittunut piumasaqaasersuisarput, Kristian Mainzillu qaqqanik, ujaqqanik basaltinik napasunik ujannanillu ivisaanik assilisai qimerluussagaanni allanik eqqarsaateqannginnissaq iluaqutaassaaq. Tamannalu Kamilla Mainzip nipilersugassiaata isumagivaa.
-Nipilersuutinik mantramut eqqaanarsinnaasunik ataatama assilisaanik isiginnaarujoornermi tusaruminartunik suliaqarnikuuvunga. Katersugaasivimmut pulaartut assit imarisaannik pissarsiaqarnissaannut iluaqutaasinnaappat nipilersortartutut anguniagara angusimassavara, Kamilla Mainzip knr.gl-ip aallartitaanut oqaluttuarpoq.
Erinniortoq oqaluttuarpoq sunaluunniit rytmimik pigisaqartoq. Inuup pileqqaarneraniit avataarsuanut, tassanilu inuuneq imminullu nuannaartorineq imminut paarlakaattuartuusut nassaarineqarsinnaapput. Tamannalu erinniortup nipilersuusiamini rytmimik ingerlaavartumik ingerlaartitsinermini atorpaa.
-Erinniap nipilersuutaaginnarnissaa kissaatiginngilara, takusalli tusaasallu ataqatigiissinnissaat kissaatigaara. Assit oqariartuutigisaat, piffissaq, nukissuit pinngortitallu anersaava ersersinniarsarisavara, Kamilla Mainz oqarpoq.