Danskinut inussiarnisaarneq Demokraatit pingaartippaat

Folketingimut qinersinissamut nunatsinni partiit qinigassanngortitassaat tamakkerlutik suli saqqummiunneqanngillat, Demokraatilli Siumullu qinigassanngortitaat nalunarunnaareerput. Partiit taakku qineqqusarutissaannik paasiniaaffigaagut, aperalugillu naalakersuisut sorliit Folketingip ataatsimiittarfianni tapersersorniarneraat. Demokraatit massakkut naalakkersuisuusut Venstret Konservativillu tapersersorniarpaat. Partiip qinigassanngortitaasa aappaat Per Berthelsen oqarpoq naalakkersuisut borgerligiusut nunatsinnut naalaarumassuseqarnertik takutissimagaat, ilaatigut illersornisamut isumaqatigiissut pillugu USA-mik isumaqatigiinniarnerit aqqutigalugit.

- Taamaattumik maanna naalakkersuisuusunik inussiarnersumik suleqateqarneq nunatsinnut iluaqutaasumik kinguneqassasoq qularutiginngilarput, Per Berthelsen oqarpoq.

Demokraatit qineqqusaarutissaat pingaarnerit pingasut danskit naalakkersuisuinik inussiarnersumik suleqateqarnermut, nunatta Danmarkillu akornanni angalaniarnerup akikillisarnissaanut nunatsinnilu avatangiisinut politikkeqarnermut tunngapput.

- Massakkut ilaasortaasut suleriaasiat akeqqersimaartoq qimallugu torersumik oqaloqatigiinnikkut namminersornerup eqqukkiartuaarnissaa pingaartipparput. Aappaattut pingaartipparput avatangiisit pillugit pitsaasumik suleqatigiinnitsigut nunatta avatangiisinut politikkeqarnerata nukittorsarnissaa pingajuattullu nunatta Danmarkillu akornanni angalaniariarnerup iluani oqilisaaqatigiinnissaq, takornariartitsinermut iluaqutaasussamik, Demokraatit siulittaasuat oqarpoq.

Per Berthelsenip saniatigut Demokraatit qinigassanngortippaat siulittaasup tullia inatsisartunilu ilaasortaq Palle Christiansen.