Ajunaarnersuaqarneranut katersat 225.000 kr.-nik ilaqqipput

Aningaasat 225.000 koruunit. Nuummi ippassaq Nuuk TV-mi akunnerit pingasut sinnerlugit TV-kut akitsorterussinermi katersorneqarsimapput. Katersat Kalaallit Røde Korsianit piaartumik Dansk Røde Korsimut ingerlatinneqassapput, Danmarkimiillu Aasiami ajunaarnersuaqarneranut eqqugaasunut ingerlateqqinneqassapput.

- Aningaasat ippassaq katersorneqartut assut iluarisimaarnarput, Kalaallit Røde Korsiani siulittaasoq nuannaaqisoq Aase Nygaard oqarpoq.

Nuuk TV-p TV-kut akitsorterussinera ippassaq ingerlanneqartoq ilanngullugu nuna tamakkerlugu katersat maanna 2,8 mio. koruunit katersorneqarsimalerput. Aase Nygaardip ilimagaa qanittukkut aningaasat katersorneqartut 3 mio. koruunit missaanniilissasut.

Taamatut ilimasunnermut nassuiaatigaa Ilulissani aqagu illunut katersuiniarnerit aamma ingerlanneqassammata, qaammatillu matuma naalernerani sapaatip akunnerata naanerani kingullermi aaqqissuussamik katersuiniartoqaqqissammat, ilaatigut aamma radiobingortitsisoqassalluni.

Qaqortumi ippassaq aamma aaqqissuussamik katersuiniartoqarsimavoq. Qaqortup borgmesteria Tommy Marø radioaviisimut oqarpoq, ippassaq timersortarfimmi katersuiniartoqarnerani inunnit 800-t 900-llu missaanni peqataaffigineqartumi aningaasat 150.000 koruunit katersorneqarsimasut. Aaqqissuussamik katersuiniartoqarnerani nipilersortuusimapput, Rasmus Lyberth, Johannes Berthelsen, meeqat atuarfianni atuartut, GU-mi ilinniartut kiisalu inuusuttut klubbimeersut.