Akitsuusersuinermut inatsit nunatsinni atuutinngilaq
Pisiniarfinni pisinermut atatillugu tigutsisit atorneranut akitsuut 50 øremik nalilik, januaarip aallaqqaataaniit Danmarkimisut nunatsinni aamma atuutilerpoq, Danmarkimili inatsit nunatsinni atuutilertinneqarsimanngimmat akitsuusersuinermut tunngavissaqarnersoq apeqquserneqarsinnaasoq inuussutissarsiornermut pisortaqarfimmi inatsisileritooq Jan Bønæs isumaqarpoq.
Tigutsisinut inatsimmi aningaaseriviit akitsuusersuinissamut periarfissaqartitaapput, inatsillu Savalimmiuni nunatsinnilu atuutinngilaq, aningaaseriviillu akitsuusersuinissaminnut tunngavissaqarnersut apeqquserneqarsinnaavoq.
Aningaaseriviit pisiniarfiillu akitsuusersuineq assortuussutaavoq, atuisartullu akiliisussanmngortinneqarput. Jan Bønæs isumaqarpoq atuisartut siunnersuisoqatigiivisa misissortariaqalissagaat ilumut tigutsisinut atatillugu akitsuusersuineq eqqortuliornerunersoq. Taanna aamma oqarpoq tigutsisit pillugit inatsit nunatsinni atuutilersinnaqassanersoq misissorlugu aallartinneqartoq.
