Danskeq maqaasineqartutut allaassimasoq ajorani nunatsinniittoq
Asiami ajunaarnersuarmut atatillugu danskit maqaasineqartut ikiliartorput.
Tamanna Rigspolitiit maqaasineqartut aqqisa allattorsimaffiisa pisortatigoortumik saqqummiunneqarnerisa kingorna paasinarsivoq.
Maqaasineqartut 268-iusut allattorsimaffianni ateq, ukiut sumilu angerlarsimaffeqarneri takuneqarsinnaapput. Aqqit pisortatigoortumik saqqummiunneqarnerisa kingorna politiinut saaffiginnissutit imaaginnavissimapput, ajunaarsimanngitsunillu paasissutissanik pissarsiaqarfiusimavoq. Maannamut 91-it maqaasineqartutut nalunaarsorneqarsimapput.
Maqaasineqartut allattorsimaffianni allassimasut ilagaat Kangerlussuami Hotelimi igaffimmi pisortaq Kim Jørgen Ernst. Taannali nunatsinniippoq ajoranilu.
- Eqqumiiginarpoq maqaasineqartut allattorsimaffiat takugakku sooq atera tassani allaqqasoq. Rigspolitiit attaviginiartarsimagaluarpakka iluatsinnaguli. Taava Nuummi politiit attaveqarfigaakka, taakkulu suliassaq tiguaat ilisimatinneqarpullu uanga maani Kalaallit Nunaanniittunga ajornangalu, Kim Jørgen Ernst oqarpoq nangillunilu.
- Ukioq kingulleq 2003-mi kingullermik Phuketimiippunga, 2004-milu apriilip maajillu qaammataani Thailandimiippunga avannaatungaani ilaquttakka tikeraarlugit. Paasiuminaatsipparali atera maqaasineqartutut allattorsimaffinniinnera, Kim Jørgen Ernst tupigusulluni oqaluttuarpoq.
Maqaasineqartut allattorsimaffianniinnera pillugu nukkami Danmarkimiik sianerfigisimagaani oqarpoq, nalunngikkaanili ajorani nunatsinniittoq, namminermisulli aamma paasiuminaatsippaat allassimaffimmiinnini, tamannalu nassuiatissaqartinnginnamiuk Kim Jørgen Ernstip manna Kangerlussuarmiittup ajuusarnartuunerarpaa.
Oqaatigineqareersutut 91-t maannamut maqaasineqarput, 119-illu tunngatillugu paasissutissat politiinit suli iluamik pissarsiarineqarsimanngitsut allattorsimaffimmut nalunaarutigineqassapput. Maannamut danskit arfineq marluk ajunaarsimasutut nalunaarutigineqareerput.