Kalaallit Nunaat ingerlalluarpoq

Suliffeqarfimmik Permagreenimik pilersitsisimasoq pisortaasoq Hans-Wiggo Knudsen Sisimiuni maanna najugaqartoq ullumi soraarninngorluni pisortatut taamaatippoq. Hans-Wiggo Knudsenip Permagreen ukiut 29-t matuma siorna aallartippaa. Radioaviisimiillu kalaallit Nunaanniinnermini misigisai pillugit oqaloqatigaarput.

Hans-Wiggo Knudsen oqaluttuarpoq pinngortitaq inuiilu nuannarilersimallugit, ukiullu marluinnaasussaagaluit ukiut 35-ngorsimasut. Kalaallit Nunaata sutigulluunniit ineriartorsimanera pissangagisimaqaa,

Kinguaariit kingulliit ammaerujussuunerarpai, politikkikkullu eqeersimaarnerarlugit. 1970-kunni oqariartaatsit maqaasinerarpai, inuusuttullu nunani allaneereersimallutik tikittartut iluaqutaalluassasut qularinngilaa.

Hans-Wiggo Knudsen pisortatut tunuarnini ugguutiginnginnerarpaa.

Suut tamarmik aallartiffeqarlutillu taamaatiffeqartarput, aamma suliffeqarfiutinni taamaappoq Hans-Wiggo Knudsen oqarpoq.

Hans-Wiggo Knudsen nulianilu Sisimiuni najugaqaannarniarput, inuussutissarsiornerlu pillugu ilinniartitsisalerusuppoq.