Aappaagu umimmattassat 1300-t

Piniarneq pillugu Siunnersuisoqatigiit sisamassaanneerlutik novembarip naanerani ataatsimmeqatigiinnerminni aappaagu imaani nunamilu piniagassanik pisassiissuteqarnissamut siunnersuuteqarput. Nunami piniagassani Kangerlussuarmi umimmanniarnissami, umimmaat 1300-it ukiuunerani februaarip aallaqqaataaniit marsip qulingata tungaanut pisassiissutigineqassasut, Piniarnermut siunnersuisoqatigiit Naalakkersuisunut inassutigaat.

Piniarnermullu Siunnersuisoqatigiinnit Kangaatsiap Sisimiut Maniitsullu kommuneqarfii umimmattassinneqassasut siunnersuutigineqarpoq. Umimmattassanik, Kangaatsiaq 100-inik, Sisimiut 675-inik kiisalu Maniitsoq 525-inik agguaassiffigineqassasut siunnersuutigineqarluni. Kommuneqarfiit pisassinneqartut namminneerlutik inuussutissarsiutigalugu piniartunut saniatigooralugulu piniartartunut agguaanissaq akisussaaffigissagaat, Piniarnermut Siunnersuisoqatigiit siunnersuipput.

Umimmattassanik siunnersuuteqarnerup saniatigut Piniarnermut Siunnersuisoqatigiit naalakkersuisunut siunnersuutigaat Nuka A/S-ip Pilersuisumit tiguneqarneranut atatillugu umimmaat neqaasa nunani allani tunitsivissarsiuunnissaat eqqarsaatigalugu suleqatigiissitamik pilersitsisoqassasoq.

Imaani piniagassat eqqarsaatigalugit Piniarneq pillugu Siunnersuisoqatigiit naalakkersuisunut siunnerssuipput Qimusseriarsuaq qilalukkanik qernertanik immikkut pisassiivinngortinneqassasoq, tassanilu pisassiisarneq ukiuni kingullerni pisarineqartut aallaavigalugit pisassiisoqartassasoq.