Juullip siorna akissarsisarneq ajorineqanngilaq
Ullumikkut decembarip 22-iat, juullimut ullut marluinnanngorput, nunatsinnilu innuttaasut qaammammusiallit amerlanerit ullumikkut akissarserrapput. Qaammammusiaqartugut januaari naappat aatsaat akissarseqqissalluta. Juulli sioqqutilaarlugu akissarsititsisarneq pillugu bankip silataani aningaasanik tigusiniat, juullimullu pisiniat isumasiorpagut. Aperineqartut ilaat isumaqarput juulli sioqqutilaarlugu akissarsisarneq iluartoq, ilaasali januaarip takinissarsua aamma puigorsimanngilaat.
Apersorneqartut ilaat ataaseq decembarip naanerani aatsaat akissarsisartoq oqarpoq juullimut sipaarneq katersinerlu misilittagarigamigit, akissarsisarnini juullip siornanut nuuttariaqanngitsoq. Decembarip naanerani akissarsisartoq oqarpoq januaari taamaalilluni ilaquttanilu takinaarpallaartanngikkitsik.
Namminersornerullutik Oqartussani allaffissornermut Pisortaqarfiup aqutsisuisa sapaatip akunnerani matumani ataatsimiinnerminni juulli sioqqutilaarlugu akissarsisitsisarneq eqqartorsimavaat. Eqqartuinermilu decembarimi akissarsititsisarnerup qaammatip naaneranut nuunneqarsinnaanera eqqartorneqarsimavoq, allaffissornermullu pisortaqarfimmit erseqqissaatigineqarpoq, decembarimi akissarsisitsinissap nuunneqarsinnaaneranut qinikkat aalajangiisussaasut.