Ilaqutariit atugarisaasa nalunaarusiorneri
Nunatsinni ilaqutariit atugarisaat pillugit ilaqutariinnermut pisortaqarfik misissuitsiteqqammerppoq. Misissuisitsinermi ilaatigut ineqarneq inuillu peqqissusiat misissorneqarpoq.
Misissuisitsineq taaneqarsimavoq ilaqutariit inuuniarnerminni atugarisaat 2004, naqitanngorlugulu ullumi saqqummiunneqarpoq. Nakuuserniartarnerit kinguaassiutitigullu atornerluisarnerit nunatsinni amerlaqisut saqqummersitami atuarneqarsinnaavoq. Pinerliinerillu taakku amerlassusaat Danmarkimut Savalimmiunullu sanilliutissagaanni aamma amerlaqisut atuarneqarsinnaavoq.
Kommunini ataasiakkaani meeqqat inuusuttullu pinngitsaaliinikkut angajoqqaaminnit qimagutitinneqarsimasut qassiuneri aamma misissuisitsisimanerup takutippaa.
Ajortutut isigineqarsinnaasut kisimik sammineqanngillat, assersuutigalugu takuneqarsinnaavoq imminortarnerit ukiut 20 ingerlanerani ikiliartorsimapput.
Ilaqutariinnermut Naalakkersuisup, Asii Chemnitz Narupip, oqaatigaa misissuisitsinermi paasisat ilaat uissuumminarsinaasut. Eqqarsaatigilluagassanilli aamma nalunaarusiaq imaqarpoq, naalakkersuisoq oqarpoq.
Ilaqutariinnermut Naalakkersuisup 2005-imi ilaqutariinnermut politikki nutaaq saqqummiusat aallaavigalugit saqqummiunnialersaarpaa.
