Issittormiut nipaat Belgiami
Issittormiut kulturiannik Belgiami nittarsaassineq, qaasuitsup ulloriaa taaguusiullugu Etoiles Polaires-mik taaneqartoq, ippassaq unnukkut naggataarneqarpoq.
Etoiles Polaires naggaserlugu Nuuk Posse-kkut Gentimi nipilersorput. Kulturikkut nittarsaassinermi nipilersornerinnaanngilaq, aammali eqqumiitsulianik saqqummersitsisoqarpoq Canadami Nunavumeersunik, Nunavimmeersunik, Saamit nunaanneersunik, Islandimeersunik nunatsinneersunillu. Tamakku ilaat Nuummi qanittukkut aliikkutarineqarput, sapaatilli akunnerani qaangiuttumi Belgiami alutorsartitsisimaqisut Katuami aaqqissuussinermi pisortaq Kim Larsen Gentimiit unnersiorpoq, pingaartumik meeqqat inngernermik ilinniartinneqarsimanerat alutornarnerarpaa.
Pauline Lumholt Bendo Schmidtilu meeqqat qilaatersornermik takutitsinissaannik sungiusarsimavaat, takutitsinerlu alutorineqarsimaqaaq. Issittumi nunat inuiisa kulturiannik Europap qiterpiaani taama nittarsaassineq kulturikkut illorsuup Katuap Belgiamilu kulturikkut illorsuit annersaasa suleqatigiillutik aaqqissuuppaat, Kim Larsenillu ilimagaa nunatsinnut iluaqutaassasoq.
Oqartoqartarmammi kulturikkut naapeqatigiinneq kinguneqarluartartoq, kisiannili ingerlaannaq sunniuttoqarnissaa ilimaginngilaa, kulturikkummi ilisimasassat peqqaanngippata qanillinavianngimmata.
Kulturikut nittarsaassinerup ulluni arfineq-pingasuni ingerlanneqarnerani inuit 19.000-it takuniaallutillu tusarniaariarsimassasut Kim Larsenip ilimagaa.
Ilanngutassiaq Mariia Simonsenimit suliarineqarpoq.