Fogh Rasmussen nassuiaateqartussanngorpoq
Nunatta Danmarkip naalagaaffianut ukiut 50-it matuma siornagut ilanngutsinneqarnera pillugu taamani naalakkersuisut salluliorsimanerannik pasilliinerit pillugit statsminister Anders Fogh Rasmussen Folketingimut nassuiaateqartussanngorpoq, apeqqutillu arlallit takkussuutilerput. Danskit naalakkersuisui Naalagaaffiit Peqatigiinnut kalaallinullu salloqittaasimaneragaapput, nunarput pinngitsaalisaapajaarluni naalagaaffeqatigiinnermut ilanngutsinneqarsimaneragaalluni. Paasissutissat ilisimaneqanngitsut nalunaarutitigut novemberimi saqqummiunneqarput, naallu pisimasut ukiut 50-it matuma siornagut pereersimagaluartut kalaallit inuiattut akuerineqarnissaannut apeqqutit ullumimut suli atuupput.
Keld Albrechtsenip Enhedslisten-meersup maanna piumasaraa, statsministeri nalunaarut pillugu isummissasoq, nalunaarummilu inernerit uppernarsassagai. Aamma isumaqarpoq, ukiut 50-it matuma siornagut pisimasut ullumikkut suli isumaqartut, Naalagaaffiit Peqatigiit uukapaatillugit kalaallit nunaat ilanngutitinneqarsimassappat ilaatigut namminersorneq pillugu ataatsimiititaliarsuarmi peqqissaartumik suleqataanissamut pisussaaffeqassallutik. Danskit taamani aperineqarsimanerat kalaallillu aperineqarsimannginnerat matumani erseqqissaatigaa.
Taamaattumik kalaallit naalagaaffeqatigiinnermi piumasaqaatinik ilusilersueqataasimanatik naalagaaffeqataajuarsimammata danskit kalaallinut akiligassaqartut Keld Albrechtsen isumaqarpoq. Atlantikup avannaani qinikkat suleqatigiiffiat aamma akissutiserusuppoq, apeqqutillu arlalissuit oqallinnissamullu apeqquteqaat tullinnguulluni.