Kangerlussuarmi sermimik hoteliliortoqassanngilaq
Kangerlussuarmi ukioq manna sermimik hoteliliortoqassanngilaq, naak ukiut siuliini sermimik hoteliliarisartakkat nunanit tamalaanit tusagassiorfinnit alutorineqarlutik nunarput nunatsinnilu takornariartitsisarneq ilanngullugit sammilluarneqartaraluartut. Sermimik hoteliliornissamut isuma takornariartitsineq pillugu siunnersuisoqatigiit Greenland Tourismip Mittarfeqarfiit suleqatigalugit aningaasalersorlugulu ukiut arfinillit matuma siornagut pilersitaraa.
Greenland Tourism pilersaarutit malillugit suliniummit tunuarsimavoq, sermimik hoteliliornissamut aningaasaliissutit amigalersillugit. Mittarfeqarfiit aningaasassaqannginneq pissutigalugu suliniummit aamma tunuaannarput. Greenland Tourismimi pisortaaneq Stig Rømer Winther oqarpoq, suliniutip taamaatinneqarnera ajuusaarutigalugu, aningaasaleeqqinnissamulli pissutissaqanngitsoq.
Suliniutilli iluatsilluarsimasup tassanngaannaq taamaatinneqarnera isiginnaaginnartariaqarnera ajuusaarnarnerarpaa. Taamatullu oqariarluni, erseqqissaavoq, aappaatigut suliniummik nangitseqqikkumasinnaasut tigusinnaassanngippassuk suliniut taamaatiinnarneqaruni immaqa pitsaanerussasoq. Siunnersuisoqatigiittut suliniutit suliffeqarfinnit allanit ingerlanneqarsinnaagaluit tamaasa tigummisinnaanagit erseqqissaavoq, suliffeqarfiillu aningaasaliiffigineqanngikkaluarlutik tigusisinnaasariaqarneraraluarlugit. Suliniulli pitsaasuummat sermimik aappaagu hoteliliortoqarsinnaanera ilimagaa, ukiormannali allaassutigiinnarnerarpaa, suleqatigissarsiornerigaluit iluatsissimannginnerat. Stig Rømer Wintherip Kangerlussuarmi 2005-imi 2006-imilu sermimik hoteleqarnissaa naatsorsuutigaa, tamannalu suliniutiginerarlugu. Sermimik hoteliliornissamut atortoq uninngaannarpoq piumasunillu pisiarineqariaannaalluni, hoteliliortoqaqqissappalli pulaartartut unnuisartartullu amerlassuserisartagarisimasaat naammanngillat amerlisariaqartullu Stig Rømer Winther erseqqissaavoq.