Akiliut Dankortilu ukiortaami akitsussapput

Akiliummik Dankortimillu atuineq ukiortaamiit akitsuallassaaq. Kortinik atuinerup akitsuuserneqarnissaanik aalajangerneq Danmarkimi naalakkersuisut bankinik isumaqatigiinniareernerisigut pivoq. Dankortimik atuinerit tamaasa atuisoq 50 ørimik akiligassinneqartassaaq, pisiniarfinnili anginerusuinnarni. Pisiniarfinni mikinerusuni, tassalu ullormut 20-it inorlugit kortersortunik pisisartulinni akiliut atussanngilaq.

Pisiffiup, Brugsenip Pilersuisulluunniit akitsuut iluanaarutimminniit tigunianngilaat. Aaallerfissaq ataasiinnaavoq, tassalu pisiniartartoq, Kalaallit Nunaanni Brugsenit pisortaat Olav Thomsen oqarpoq.

- Akitsuut pisisartunut akilertinngikkutsigu pisiniarfik ajunaaruteqassaaq. Nioqqutissat akitsorsinnaanngilagut pisiniarfinnut allanut unammillerniartussaagatta, taamaattumik pisiniap Dankortimik atuinini nammineq akilertariaqarpaa, Olav Thomsen oqarpoq.

Pisiniarfiit akitsuummik atuisuminnut akiliisussanngortitsinerat Sparbank Vestip pisortaata Svend Lysep paatsuungassutigaa.

- Akitsuut pisiniarfinnut tunngavoq, pisiniarfiillu pisisartuminnut tutsitsiniarnertik namminneq akisussaaffigaat, Svend Lyse oqarpoq.

Taama oqarnera Pilersuisumi iluarineqanngilaq. Bankit akitsuusiinerata pisiniarfiit sakkugalugit akilersinniarneqarnissaa Gerhardt Petersenip iluarinngilaa, Brugsenillu pisortaata pisisartunit ajorineqarnissartik aarlerigaa.

-Aarleqqutigaara nammagittaalliuutit bankinut tunnatik pisiniarfinnut tutsinneqassasut, Olav Thomsen oqarpoq.

Akitsuut 50 øriusoq pisiniarfinni tamani akileqquneqarsinnaavoq, Dankortili suli atorneqartinnagu pisiniaq akitsuummik akiliisussaaneranik ilisimatinneqaqqaassaaq.

Pisiniarfiit ullormut 20-it inorlugit kortinik akiliisartullit akiliissanngillat, taamalu pisisartuminnik akiliisitsisinnaanatik.