Namminersorneq pillugu isumalioqatigiissitaq kalaallinit Danskinillu ilasortaatitaqartoq Københavnimi ullumi ataatsimiilluni aallartissaaq. Isumalioqatigiissitap aappassaani ataatsimiinnermini oqaluuserisassaasa ilagaat kalaallit inuiattut akuerineqarnissaat, piginnaatitaaffiit kiisalu Kalaallit Nunaata Danmarkillu naligiillutik peqatigiissinnaanerannut tunngasut.
- Tunngaviusumik apeqqutinut ataatsimut isummersinnaagutta apeqqutit allat akissutissarsinissaat ajornaannerulissaaq, Namminersorneq Pillugu Isumalioqatigiissitat siulittaasuat Kalistat Lund Sermitsiamut tallimanngormat saqqummersumut oqarpoq.
Namminersorneq pillugu isumalioqatigiissitaq nunatsinni marsip 15-ianni pingajussaanik ataatsimiissaaq, sisamassaanillu Danmarkimi junip 14-iani ataatsimiissalluni.