Ilinniartitsisut annersarneqarnerminnik imaluunniit siorasaarneqarsimanerminnik saaffiginnissuteqartartut amerliartortut Ilinniartitsisut kattuffiat IMAK nalunaarpoq.
Ilinniartitsisut nalunaarutiginnittalernerannut IMAK-ip Kanukokallu suleqatigiillutik upernaaq paasititsiniaasimanerat pissutaatinneqarpoq.
- Paasititsiniaanerup siorna nalunaartoqartanngikkaluarpoq, maannali qaammatit tamaasa ilaanni arlaliullutik saaffiginnittartut amerliartorput, IMAK-imi atorfilik Lisbeth Frederiksen oqarpoq.
Annersarneqarsimallutik siorasaarneqarsimallutilluunniit saaffiginnittut amerlassusiat IMAK-imi kisitsisaatigineqanngilaq Suliffinnilli Nakkutilliisoqarfimmi imaluunniit sulinermi ajutoortoqarsimatillugu ataatsimiititaliami saaffiginnissutit naatsorsorneqartarput.