Nukami sulisut amerlanersaat nooqataassapput
29. november 2004 09:14
Nuka A/S-ip allaffeqarfiata Nuummiittup Maniitsumut Sisimiunullu nuunneqalernerani sulisut maannamut sinneruttut 16-it ilaat 12-t Maniitsumut Sisimiunullu nooqataalerput.
Pilersuisup pisortaata Gerhardt Petersenip tamanna iluarisimaarpaa, sulisut ilisimasaat taamaalillutik annaaneqassanngimmata. Sulisut noqqataanianngitsut ajunngitsorsiassanik tunineqassapput, tassa sulinngikkaluarlutik qaammammi ataatsimi akissarsiaqartinneqassalutik. Atorfiit sinneri ammasumik inuttassarsiunneqassapput.
Maniitsumut arfineq-pingasut nuussapput, Sisimiunut pingasut nuussallutik.
