Ilimageriikatsinnit pissarsiaqarneruvugut, neriuutigisatsinnilli pissarsiakinnerulluta, ICC-ip præsidentia Sheila Watt Cloutier, Issittumi Siunnersuisoqatigiit Islandimi ataatsimiinneranni inernerusut pillugit oqarpoq.
Ataatsimiinnermi nunat issittumiittut arfineq-pingasut peqataaffigisaanni siullermeersumik isumaqatigiilluni iliuuseqaqatigiittoqarnissaa isumaqatigiissutigineqarpoq. Nunat USA ilanngullugu isumaqatigiissutigaat silaannaap allangoriartornerata sunniutissaanik saqqummiussat ilumoorullugit tiguneqartariaqartut. USA-p isumaqataanera pingaartutut nunarput Danmarkilu sinnerlugit peqataasup Josef Motzfeldtip isigaa.
- Sikumi sukkasuumik aakkiartulersimasumi issianertik kiisami paasilersimagunarpaat, Josef Motzfeldt USA-p isumaqataalernerat pillugu oqarpoq.
Issittumi Siunnersuisoqatigiinni isumaqatigiisutaasut ICC-p Nalagaaffiit Peqatigiit avatangiiseq pillugu ataatsimeersuartitsinissaani Argentinami qammatip tulliani pisussami atorluarniarpai, siunissamilu kiattuni qeqqertaaqqat silannaap kissakkiartornerata kingunerisinnaasai pillugit suleqatiseriniarlugit.