Eqqunngitsuliornerit, uukapaatitsiniarnerit nipangiussinerillu
Ukioq manna ukiut 50-it qaangiupput, Naalagaaffiit Peqatigiit nunatta Danmarkimut ilanngutsinneqarnera akuerimmagu.
Tamatumunnga atatillugu nunatta Danmarkimut ilanngutsinneqarnera pillugu atuakkiamik ullumi saqqummersitsisoqarpoq.
Atuakkiaq Atlantikup Avannaani Qinikkat Suleqatigiiffiata kaammattuuteqarneratigut piviusunngorpoq.
Suleqatigiissitaq kalaallit inuiattut pisinnaatitaaffiinik nunattalu Danmarkimut ilanngitsinneqarnerani pisunik misissuisussaq, Atlantikup Avannaani Qinikkat Suleqatigiiffianit pilersinneqarpoq, suleqatigiissitallu misissuinera taamaalilluni atuaganngortoq Lars-Emil Johansen, Atlantikup Avannaani Qinikkat Suleqatigiiffiani ilaasortaq oqarpoq. Atuakkiallu nunatta namminersulernissaa pillugu oqillinnermut toqqammavilersueqataanissaa siunertaasoq, Lars-Emil Johansen oqarpoq.
Atuakkiap saqqummersinneqaranut atatillugu Københavnimi tusagassiortunik katersortitsinermi atuakkioqataasoq, kalaaleq filosofiimik ilisimatusarsimasoq Mininnguaq Kleist oqarpoq, atorlugit nunarput Danmarkimut ukiut 50-it matuma siorna ilanngutsinneqarsimasoq.
Mininnguaq Klesit isumaqarpoq nunatta ullumikkut pisinnatitaaffii Danmarkimi ukiut 50-it matuma siornagut suleriuseq naapertorlugu inissinneqarnerminnit ullumikkumut allanngungaarsimanngitsut.
Nalagaaffiit Peqatigiit namminersulernissaq pillugu pingasunik qinigassaqartitsipput, taamanikkuli Landsrådi naalagaaffimmit marluinnarnik qinigassinneqarsimavoq, tassalu ilanngutsitaaneq imaluunniit namminersulivinneq, pingajuallu namminersulernermut tunngasoq nipangiunneqarsimavoq.
-Taamanikkut dansket atorfilittai ilisimatitsisimapput nunarput namminersulivissappat naalagaaffik namminersortunngorsaanermi ikiuinissamut pisussaatitaanermut pituttorsimanngitsoq, tamannalu eqqunngitsuliorneruvoq, atuakkioqataasoq Mininnguaq Kleist oqarpoq. Nunatta Danmarkip naalagaaffianut ilanngutsinneqarnerani uppernarsaatit maannamut saqqummiunneqarsimanngitsut karserpassuarnut toqqortat toqqammavigalugit atuakkiorneq ingerlanneqarpoq.