Peqqinnissamut kattuffik akuerineqarpoq
Isumaqatigiissutinik tunngaviusunik Naalakkersuisut unioqqutitsinerarlugit Peqqinnissaq Pillugu Kattuffiit isumaqatigiissitsiniartoqarnissaanik piumasaqarnerat Namminersornerullutik Oqartussanit akuerineqarpoq.
Isumaqatigiissutit tunngaviusut oqaasertaasa qanoq paasineqarsinnaanerat aalajangersaavigitikkumallugu Kattuffiit pisortanik isumaqatigiinniarumasimapput, isumaqatigiissutit malillugit ullut 14-it qaangiutsinnagit illua´tungilittumit akineqartussamik. Pisortalli akisimanngimmata, kattuffiillu isumaqarmata pisortat isumaqatigiissutinik unioqqutitsisut, isumaqatigiissitsiniartoqarnissaanik kattuffiit piumasaqarput.
Illua´tungeriit tamarmik immikkut inunnik marlunnik isumaqatigiissitsiniarnissamik sulissutiginnittussanik ullut 14-it ingerlaneranni toqqaasussaapput, piffissaliusamilli pisortat aamma qaangiimmata kattuffik tusagassiutitigut naammagittaalliuteqarpoq, ippassarlu kiisami akissutisisimallutik kattuffik erseqqissaavoq.
- Namminersornerullutik Oqartussat eqqartuussisuserisuannit allagarsivugut, isumaqatigiissitsiniarnissamullu kikkut aallartitarineqassanersut aamma taaneqarsimapput. Maannalu suliassaq tullinnguuttoq tassaavoq, isumaqatigiissitsiniarnissamut illua´tungeriilluta ulluliinissarput. Peqqinnissaq Pillugu Kattuffinni siulittaasoq Birtha Bianco ippassaq ualilluinnaraa oqarpoq.
Nunatta eqqartuussiviani eqqartuussisut qullersaat nalinginnaasumik isumaqatigiissitsiniartuusarpoq.