Siulittaasunngornera tulluartinngilaa
Naalakkersuisunut ilaasortaasimasup pisortaqarfimmini aningaasanik aqutsinerliorsimasup nakkutilliisussanngorlugu aningaasaqarnermut ataatsimiititaliamut siulittasunngortitaanera inuinnaat naalakkersueqataanerannut naleqqutinngilaq, Ilisimatusarfiup ilaani pisortaq Daniel Thorleifsen oqarpoq, Thorleifsenilu aperaarput sunarpiaq ajornartorsiutitut isigineraa:
- Naalakkersuisunut ilaasortaanerminit tunuarpoq, tunuartitaalernini pissutigigunarlugu. Tassanilu ajornartorsiutaanerpaasimavoq, aningaasanik aqutsinera, apeqquserneqarsimalluni. Taavalu massakkut aningaasanik aqutsinermut nakkutilliisussanngorsimalluni. Daniel Thorleifsen tunngavilersuivoq.
Naalakkersuisut siulittaasuat Hans Enoksen aqutsinerliorsimanerarpaa, inuiaqatigiinnit isigalugu ajornartorsiutaanerarlugu, naalakkersuisutut tunuartup akisussaaffimmik taama annertutigisumik tunineqarmat.
- Inuinnaat naalakkersuisooqataanerannut ajoqutaasinnaavoq, aalajangiisarnerit taamaattut ilungersunartut apeqquserneqarsinnaasullu ingerlajuartillugit inuiaqatigiit tunussisinnaanerat ulorianaateqarsinnaavoq. Erseqqissaavoq.
Daniel Thorleifsen aamma oqarpoq, ullumikkorpiaq qinersisoqaraluarpat maanna naalakkersuisooqatigiinnut sunniuteqarnerlussagaluartoq pisimasut inuit suli eqqaamammatigit.