Aningaasanut inatsisissaq isumaqatigiinngissutigaat

Pilersaarutit malillugit inatsisartut ukiaanerani ataatsimiinnerisa ullumi kingullersaraat.

Inatsisartut aalajangiiffigisassatut pingajussaanik eqqartussavaat aningaasanut aappaagumut inatsisissaq.

Aningaasaqarnermut ataatsimiititaliami partiit inatsisissaq pillugu isumaqatigiippallaanngillat, ippassarlu ualikkut aatsaat pingajussaaneernissaanut siunnersuut naammassivaat, ippassarlu unnukkut suli isumaqatigiinngissutigineqarpaluppoq, taamaammat inatsisartut ataatsimiinnerat ullormik ataatsimiinneq kinguarterataannaavoq.

Naalakkersuisunut ilaasortatut ippassaq tunuartoq Simon Olsenni inatsisartuni ilaasortatut peqataassaaq, aalisarnermullu naalakkersuisunngorlaaq Rasmus Frederiksen naalakkersuisut akornaniissaaq.

Simon Olsenip naalakkersuisuujunaarnerata kingorna Siumumi inatsisartuni ilaasortat allanngortikkusunnagit Jørgen Væver Johansen inatsisartuni ilaasortatut sulinngiffeqarnissaminut qinnuteqarpoq akuerineqarlunilu.

Taamaasilluni Siumup inatsisartuni sinniisui pingasut issiaannartussanngorput, tassaappullu Ole Thorleifsen, Per Rosing Petersen kiisalu Kalistat Lund.

Kalistat Lund inatsisartuni issiaannarnissaa pingaaruteqarnerarneqarpoq, namminersulivinnissamut isumalioqatigiissitamut siulittaasuugami. 

Sinnisussatullu issiasoq Ole Thorleifsen aningaasaqarnermut ataatsimiititaliami siulittaasuuvoq. Per Rosing Petersen nunanut allanut sillimaniarnermullu ataatsimiititaliami siulittaasuuvoq.