Qaanaami piniartunut partiit ilaat aningaasaliivoq
Immap suli sikunnginnera, piniagassaalatsineq silallu ajoqattaarnera pissutaalluni Qaanaami piniartut aningaasatigut ajornartorsiornerminni qimminut nerukkaatissaarullutik qimmiminnik ikilileralutik toqoraasariaqarnerat pillugu tusarliussaqartareersugullu, partiit ilaat aningaasatigut tapiissuteqarpoq. Siumut Nuuk 5.000 koruuninik maanna tapiissuteqarpoq, sinerissamilu pisinnaasunik suliniuteqaqqusilluni. Naalakkersuisut nerukkaatissarsiornermi ikiuuteqqullugit aamma kaammattorpai.
Ulluni kingullerni tusarliupparput, qimussertartut kattuffiat ikiorsiiniarluni aningaaserivimmi kontomik ikisiffigineqarsinnaasumik ammaasimasut. Atassutip Naalakkersuisut aamma kaammattoreerpai, aningaasanik ikiorsiissutissanik nassaarniaqqullugit, Inatsisartullu piniarnermut ataatsimiititaliaani ilaasortaq Inuit Ataqatigiinneersoq Aqqalukasik Kanuthsen, aalisartunut, piniartunut, nunaateqarnermilu inuussutissarsiuteqartunut immikkut ikiorsiissutinut aningaasaateqarfimmut aamma qinnuteqaqqusereerluni.
Siumup Inatsisartuni aningaasaqarnermut ataatsimiititaliaani ilaasortaatitaa Ruth Heilmann aamma erseqqissaareerpoq, qinnuteqaammik takkuttoqarpat nalilersuiumaarlutik. Demokraatinit Astrid Fleischer Rex sisamanngormat oqarpoq, apeqqut suli isumammerfigisimanagu.